കൂട്ടുകാരെ പണ്ടൊക്കെ ഞാൻ കയ്യിൽ പണം വന്നാൽ ഒന്നും നോക്കാതെ തോന്നിയ പോലെ ചിലവാക്കുന്ന ഒരു ശീലം എനിക്ക് ഉണ്ടായിരുന്നു.മാസം അവസാനം ആകുമ്പോ കയ്യിൽ പണം ഇല്ലാത്ത ഒരു അവസ്ഥയിലും എത്തുമായിരുന്നു.ശെരിക്കും പറഞ്ഞാൽ എത്ര രൂപ ഉണ്ടാക്കുന്നു എന്നതിലല്ല,മറിച്ച് എത്ര രൂപ സേവ് ചെയുന്നു എന്നതാണ് പ്രധാനം.പണം ചിലവാക്കുമ്പോ ഒരു നൂറു വട്ടം എങ്കിലും ചിന്തിക്കണം,ഈ പണം അനാവശ്യം ആണോ ആവശ്യം ആണോ എന്നു.ഞാൻ എന്റെ ലൈഫിൽ ചില മാറ്റങ്ങൾ കൊണ്ട് വന്നപ്പോൾ പണ ചിലവ് കുറയ്ക്കാനും എനിക്ക് സാധിച്ചു.ഞാൻ പരീക്ഷണങ്ങൾ നടത്തി വിജയിച്ച അത്തരം കാര്യങ്ങൾ ആണ് ഞാൻ ഇവിടെ നിങ്ങളുമായി പങ്ക് വെക്കുന്നത്.
ഇന്നത്തെ കാലത്ത് വിലക്കയറ്റം കൊണ്ട് ജീവിക്കാൻ ബുദ്ധിമുട്ട് അനുഭവിക്കുന്നവർ ആണ് ഭൂരിഭാഗം ആളുകളും. വരുമാനം കൂടുന്നുണ്ടെങ്കിലും അതിനേക്കാൾ ചിലവുകളും കൂടി വരുന്ന വല്ലാത്ത ഒരു അവസ്ഥയാണ് എങ്ങും കണ്ടു വരുന്നത്.എന്നാൽ കൃത്യമായ പ്ലാനിംഗും ചെറിയ ചില നിയന്ത്രണങ്ങളും ഉണ്ടെങ്കിൽ നമുക്ക് വലിയൊരു തുക ബാങ്ക് അക്കൗണ്ടിൽ ലാഭിച്ചുവെക്കാൻ സാധിക്കും. പണം ലാഭിക്കുക എന്നത് കഷ്ടപ്പാടുള്ള ഒരു കാര്യമല്ല, മറിച്ച് അതൊരു ശീലമാണ്. നമ്മുടെ നിത്യജീവിതത്തിൽ കൊണ്ടുവരാൻ പറ്റുന്ന ചില പ്രായോഗികമായ മണി സേവിങ് ടിപ്പുകൾ താഴെ വിശദമായി പരിശോധിക്കാം.
1. 50/30/20 റൂൾ പിന്തുടരുക
സാമ്പത്തിക വിദഗ്ദ്ധർ പറയുന്ന ഏറ്റവും മികച്ചൊരു ഫോർമുലയാണിത്. നിങ്ങളുടെ മാസവരുമാനത്തിന്റെ 50 ശതമാനം വീട്ടുവാടക, പലചരക്ക് സാധനങ്ങൾ, കറന്റ് ബിൽ തുടങ്ങിയ അത്യാവശ്യ കാര്യങ്ങൾക്കായി (Needs) മാറ്റിവെക്കുക. 30 ശതമാനം തുക നിങ്ങളുടെ ആഗ്രഹങ്ങൾക്കായി (Wants – സിനിമ, യാത്രകൾ) ഉപയോഗിക്കാം. എന്നാൽ ബാക്കി വരുന്ന 20 ശതമാനം തുക നിർബന്ധമായും ആദ്യം തന്നെ സമ്പാദ്യമായി (Savings) മാറ്റിവെക്കണം. ശമ്പളം കിട്ടിയ ഉടൻ തന്നെ ഈ 20 ശതമാനം മാറ്റി വെക്കുന്നത് വഴി അനാവശ്യ ചിലവുകൾ ഒരു പരിധി വരെ തടയാൻ സാധിക്കും.
2. ഒരു മാസത്തെ ബജറ്റ് തയ്യാറാക്കുക
പണം എങ്ങോട്ടാണ് പോകുന്നതെന്ന് മനസ്സിലാക്കാനുള്ള ആദ്യ ചുവടുവെപ്പാണ് ബജറ്റ് നിർമ്മാണം. മാസം തുടങ്ങുമ്പോൾ തന്നെ വരാൻ സാധ്യതയുള്ള ചിലവുകൾ ഒരു ഡയറിയിലോ മൊബൈൽ ആപ്പിലോ എഴുതി വെയ്ക്കുക. ഇങ്ങനെ ചെയ്യുമ്പോൾ നമ്മൾ അറിയാതെ പോകുന്ന ചെറിയ ചിലവുകൾ പോലും നമ്മുടെ ശ്രദ്ധയിൽ പെടും. ബജറ്റിന് പുറത്തുള്ള ഒരു കാര്യത്തിനും പണം ചിലവാക്കില്ല എന്ന് ഉറച്ച തീരുമാനമെടുക്കുക.
3. ഷോപ്പിംഗിന് പോകുമ്പോൾ ‘ലിസ്റ്റ്’ കൊണ്ട് പോവുക
പലചരക്ക് സാധനങ്ങളോ തുണികളോ വാങ്ങാൻ സൂപ്പർമാർക്കറ്റുകളിൽ പോകുമ്പോൾ ഒരു ലിസ്റ്റ് തയ്യാറാക്കി കൊണ്ടുപോകുന്നത് ശീലമാക്കുക. മാളുകളിലെയും സൂപ്പർമാർക്കറ്റുകളിലെയും ആകർഷകമായ ഓഫറുകളിൽ വീണ് നമ്മൾ പലപ്പോഴും ആവശ്യമില്ലാത്ത സാധനങ്ങൾ വാങ്ങി കൂട്ടാറുണ്ട്.നമ്മുടെ ലിസ്റ്റിലുള്ള സാധനങ്ങൾ മാത്രം വാങ്ങുക, ബില്ലിംഗ് കൗണ്ടറിലേക്ക് പോവുക. ഇത് വലിയൊരു തുക ലാഭിക്കാൻ നിങ്ങളെ സഹായിക്കും.
4. 30 ദിവസത്തെ നിയമം (30-Day Rule) പരീക്ഷിക്കുക
വിലകൂടിയ ഏതെങ്കിലും ഒരു സാധനം (മൊബൈൽ ഫോൺ, വാച്ച്, ഗാഡ്ജെറ്റുകൾ) വാങ്ങണം എന്ന് തോന്നുമ്പോൾ ഉടൻ തന്നെ അത് വാങ്ങരുത്. പകരം 30 ദിവസം കാത്തിരിക്കുക. ആ ഒരു മാസത്തിന് ശേഷവും നിങ്ങൾക്ക് ആ സാധനം അത്യാവശ്യമാണെന്ന് തോന്നുകയാണെങ്കിൽ മാത്രം അത് വാങ്ങുക. ഭൂരിഭാഗം സമയത്തും ഒരു ആവേശത്തിന് വാങ്ങാൻ തോന്നുന്ന പല കാര്യങ്ങളും പിന്നീട് നമുക്ക് ആവശ്യമില്ല എന്ന് ബോധ്യപ്പെടാൻ ഈ സമയം സഹായിക്കും.
5. ക്രെഡിറ്റ് കാർഡുകളുടെ അമിതമായ ഉപയോഗം കുറയ്ക്കുക
കയ്യിൽ കാഷ് ഇല്ലങ്കിലും സാധനങ്ങൾ വാങ്ങാം എന്നതാണ് ക്രെഡിറ്റ് കാർഡുകളുടെ ആകർഷണം. ഇത് പലരെയും വലിയ കടക്കെണിയിൽ കൊണ്ട് എത്തിക്കാറുണ്ട്. ശെരിയായ സമയത്ത് ബിൽ അടച്ചില്ലെങ്കിൽ വലിയ പലിശയാണ് ബാങ്കുകൾ വാങ്ങിക്കുന്നത്. അതുകൊണ്ട് മാക്സിമം ഡെബിറ്റ് കാർഡുകളോ യുപിഐ (UPI) ട്രാൻസാക്ഷനുകളോ ഉപയോഗിക്കുക. കയ്യിലുള്ള പണം മാത്രം ചിലവാക്കാൻ ഇത് നമ്മെ പ്രേരിപ്പിക്കും.
6. സബ്സ്ക്രിപ്ഷനുകൾ പരിശോധിക്കുക
നെറ്റ്ഫ്ലിക്സ്, ആമസോൺ പ്രൈം, ഡിസ്നി പ്ലസ് ഹോട്ട്സ്റ്റാർ തുടങ്ങിയ ഒടിടി പ്ലാറ്റ്ഫോമുകളുടെയും മറ്റ് ആപ്പുകളുടെയും സബ്സ്ക്രിപ്ഷൻ ചാർജ്ജുകൾ നമ്മൾ അറിയാതെ ബാങ്ക് അക്കൗണ്ടിൽ നിന്ന് പോകാറുണ്ട്. നിങ്ങൾക്ക് ഉപയോഗമില്ലാത്ത ആപ്പുകളുടെ സബ്സ്ക്രിപ്ഷനുകൾ ഉണ്ടെങ്കിൽ ഉടനെ തന്നെ ക്യാൻസൽ ചെയ്യുക. ചെറിയ പൈസയാണെന്ന് നമുക്ക് തോന്നുമെങ്കിലും ഒരു വർഷം കൂട്ടുമ്പോൾ ഇത് വലിയൊരു സംഖ്യയായിരിക്കും.
7. പുറത്തുനിന്നുള്ള ഭക്ഷണം കുറയ്ക്കുക
ഇന്നത്തെ കാലത്ത് ഹോട്ടൽ ഭക്ഷണവും ഓൺലൈൻ ഫുഡ് ഡെലിവറി ആപ്പുകളുടെ ഉപയോഗവും വലിയൊരു ചിലവാണ്. ആഴ്ചയിൽ ഒന്നോ രണ്ടോ തവണ പുറത്തുനിന്ന് കഴിക്കുന്നത് കുഴപ്പമില്ല, എന്നാൽ ഇത് സ്ഥിരമാക്കുന്നത് സാമ്പത്തികത്തെയും ഒപ്പം ആരോഗ്യത്തെയും ബാധിക്കും. വീട്ടിൽ തന്നെ ഭക്ഷണം പാകം ചെയ്ത് കഴിക്കുന്നത് വഴി പണവും ആരോഗ്യവും ഒരുപോലെ സംരക്ഷിക്കാം. ജോലിക്ക് പോകുമ്പോൾ വീട്ടിൽ നിന്ന് ലഞ്ച് ബോക്സ് കൊണ്ടുപോകുന്നത് ശീലമാക്കൂ.
8. വെള്ളം, കറന്റ് ബില്ലുകൾ നിയന്ത്രിക്കുക
വീട്ടിലെ വൈദ്യുതി ഉപയോഗം കുറയ്ക്കുന്നത് വഴി മാസ ബില്ലിൽ വലിയ മാറ്റം വരുത്താം. ആവശ്യമില്ലാത്തപ്പോൾ ലൈറ്റുകളും ഫാനുകളും ഓഫ് ചെയ്യുക. എൽഇഡി (LED) ബൾബുകളും സ്റ്റാർ റേറ്റിംഗ് ഉള്ള ഉപകരണങ്ങളും ഉപയോഗിക്കുക. ഇൻവെർട്ടർ എസികൾ ഉപയോഗിക്കുന്നത് വഴി വൈദ്യുതി ലാഭിക്കാം. വൈകീട്ട് 7 മണി മുതൽ 10 മണി വരെയുള്ള സമയങ്ങളിൽ മിക്സി,വാട്ടർ പമ്പ് ഉപയോഗിക്കുന്നത് നിർത്തുക, അതുപോലെ തന്നെ വെള്ളം പാഴാക്കി കളായതിരിക്കാനും ശ്രദ്ധിക്കണം.
9. വാഹനത്തിന്റെ ഇന്ധന ചിലവ് കുറയ്ക്കാം
അടുത്തുള്ള സ്ഥലങ്ങളിലേക്ക് പോകുമ്പോൾ ബൈക്കോ കാറോ എടുക്കുന്നതിന് പകരം നടന്നു പോകുകയോ സൈക്കിൾ ഉപയോഗിക്കുകയോ ചെയ്യുക. ഓഫീസുകളിലേക്ക് പോകുമ്പോൾ ഒരേ റൂട്ടിലുള്ള സുഹൃത്തുക്കളോടൊപ്പം കാർ പൂളിംഗ് (Car Pooling) നടത്തുന്നത് ഇന്ധന ചിലവ് പകുതിയാക്കാൻ സഹായിക്കും. പൊതുഗതാഗത സംവിധാനങ്ങൾ (ബസ്, ട്രെയിൻ) പരമാവധി ഉപയോഗിക്കുക.
10. കുട്ടികളെ പണത്തിന്റെ വില എന്താണെന്നു പഠിപ്പിക്കുക
ഏറ്റവും ചെറിയ പ്രായത്തിൽ തന്നെ കുട്ടികൾക്ക് സമ്പാദ്യ ശീലം വളർത്തിയെടുക്കുക. അവർക്കായി ഒരു കുടുക്ക (Piggy Bank) വാങ്ങി നൽകാം. ചോദിക്കുന്നതെല്ലാം വാങ്ങി നൽകുന്നതിന് പകരം, പണം കഷ്ടപ്പെട്ട് ഉണ്ടാക്കുന്നതാണെന്ന് അവരെ ബോധ്യപ്പെടുത്തുക. ഇത് ഭാവിയിൽ അനാവശ്യ ചിലവുകളിൽ പ്പെടാതെ നല്ലൊരു സാമ്പത്തിക അച്ചടക്കമുള്ളവരായി വളരാൻ ഇത് അവരെ സഹായിക്കും.
11. ലോണുകളും പലിശകളും ഒഴിവാക്കുക
നാട്ടുകാരെ കാണിക്കാനായി,ആഡംബര ജീവിതത്തിനായി പേഴ്സണൽ ലോണുകളോ ലേബർ ലോണുകളോ എടുക്കുന്നത് പൂർണ്ണമായും ഒഴിവാക്കുക. പലിശ ഇനത്തിൽ മാത്രം വലിയൊരു തുകയാണ് നമ്മൾ ബാങ്കുകൾക്ക് നൽകുന്നത്. എന്തെങ്കിലും വാങ്ങണം എന്നുണ്ടെങ്കിൽ അതിനായി പണം കയ്യിൽ ഉണ്ടെങ്കിൽ മാത്രം വാങ്ങുക. കടമില്ലാത്ത ജീവിതമാണ് ഏറ്റവും വലിയ സൌഭാഗ്യവും സമ്പാദ്യവും.പിന്നെ മനസ്സിന് വളരേയേറെ സമാധാനവും കിട്ടും.
12. ചെറിയ തുകകൾ നിക്ഷേപിക്കുക (SIP)
പണം വെറുതെ സേവിങ്സ് അക്കൗണ്ടിൽ ഇട്ടാൽ അതിന് വലിയ പലിശ ലഭിക്കാറില്ല. അതിനുപകരം മ്യൂച്വൽ ഫണ്ടുകളിലോ പിപിഎഫ് (PPF) പോലുള്ള സർക്കാർ പദ്ധതികളിലോ ചെറിയ തുകകൾ എല്ലാ മാസവും നിക്ഷേപിക്കുക (Systematic Investment Plan). ദീർഘകാലാടിസ്ഥാനത്തിൽ ഇത് കോമ്പൗണ്ടിങ് (Compounding) വഴി വലിയൊരു തുകയായി വളരും.
ചുരുക്കത്തിൽ പറഞ്ഞാൽ
പണം ലാഭിക്കാനുള്ള ശീലങ്ങൾ എന്ന് പറഞ്ഞാൽ ഒന്നിനും പണം ചിലവാക്കാതെ കഷ്ടപ്പെട്ട് പിശുക്കി ജീവിക്കുക എന്നല്ല അർത്ഥം. മറിച്ച്, ആവശ്യം ഇല്ലാത്ത ചിലവുകൾ വേണ്ട എന്നു വെച്ചു പണത്തിന് കൃത്യമായ മൂല്യം നൽകുക എന്നതാണ്. ഇന്ന് നമ്മൾ ലാഭിക്കുന്ന ഓരോ രൂപയും നാളെ നമ്മുടെ ആപത്ഘട്ടങ്ങളിൽ തുണയായി എത്തും. ഈ ശീലങ്ങൾ നിങ്ങളുടെ ജീവിതത്തിലും പരീക്ഷിച്ചു നോക്കൂ. നൂസ് മലയാളം വായനക്കാർക്ക് ഐശ്വര്യവും സാമ്പത്തിക ഭദ്രതയും നിറഞ്ഞ ഒരു ജീവിതം ആശംസിക്കുന്നു!
ഈ മണി സേവിങ് ടിപ്പുകൾ നിങ്ങൾക്ക് ഉപകാരപ്പെട്ടുവോ? നിങ്ങൾ പണം ലാഭിക്കാൻ ഉപയോഗിക്കുന്ന വഴികൾ താഴെ കമന്റ് ചെയ്യൂ. കൂടുതൽ വിവരങ്ങൾക്കായി Noos Malayalam സന്ദർശിക്കുന്നത് തുടരുക!
